Félagsþjónusta Akraneskaupstaðar

Fjárhagsaðstoð

Fjárhagsaðstoð er til einstaklinga og fjölskyldna sem hafa ónógar tekjur sér til framfærslu og geta ekki  séð fyrir sér og sínum sbr. IV. og VI. kafla laga nr. 40/1991 um félagsþjónustu sveitarfélaga og reglur um fjárhagsaðstoð samþykkt á Akranesi 27. apríl 2010. Fjárhagsaðstoð er einnig veitt þar sem löggjöf mælir fyrir um aðgerðir, sem hafa í för með sér fjárútlát t.d. ákvæði barnaverndarlaga nr. 80/2002  VI.  og XII. kafla.

Barnavernd (sjá erindisbréf fyrir barnaverndarnefnd)

Að barnavernd er unnið samkvæmt lögum um vernd barna og ungmenna nr. 80/2002.  Markmið barnaverndar er að tryggja börnum og ungmennum viðunandi uppeldisskilyrði.  Það er gert með því að styrkja uppeldishlutverk fjölskyldunnar og beita úrræðum til verndar einstökum börnum þegar það á við.  Með börnum er átt við einstakling innan 18 ára aldurs.

Forsjármál

Unnið skv. Barnalögum nr. 20/1992.  Málin berast frá dóms- og kirkjumálaráðuneytinu, sýslumannsembættum, dómstólum  og er þá verið að óska eftir umsögn  félagsmálaráðs(barnaverndarnefndar).

Umgengnisréttarmál

Unnið skv. Barnalögum nr.20/1992.  Málin  berast frá sýslumönnum og dómstólum þar sem óskað er eftir umsögn og  eða vinnu við að koma á samkomulagi. Einnig beiðnir um ráðgjöf frá foreldrunum sjálfum til þess m.a. að reyna að fyrirbyggja deilur.

Ættleiðingarmál

Unnið skv. lögum um ættleiðingu nr. 130/1999. Málin berast frá dóms- og kirkjumálaráðuneytinu. Gera þarf mjög nákvæma greinargerð um hagi væntanlegra kjörforeldra og hæfni þeirra til að taka að sér kjörbarn.  Þetta á við bæði hvað varðar ættleiðingar erlendis frá og ættleiðingar stjúpbarna.

Fósturmál

Unnið skv. reglugerð um ráðstöfun barna í fóstur nr. 532/1996.  Starfsmenn Félagsþjónustu annast málefni barna sem fara í varanlegt fóstur þar til forsjárskyldur falla niður skv. lögum.  Gerð er úttekt á hæfni og högum þeirra sem óska eftir að gerast fósturforeldrar.

Liðveisla

Unnið skv. lögum um málefni fatlaðra nr. 59/1992. Sveitarfélög skulu eftir föngum gefa fötluðum kost á liðveislu.  Með liðveislu er átt við persónulegan stuðning og aðstoð sem einkum miðar að því að rjúfa félagslega einangrun, t.d. aðstoð við að njóta menningar- og félagslífs.  Umsókn um liðveislu kemur frá hinum fatlaða sjálfum, aðstandendum eða svæðisskrifstofu Vesturlands.

Málefni fatlaðra - Sjá frekari upplýsingar hér

Málaflokkur fatlaðra fluttist frá ríki til sveitarfélaga 1. janúar 2011.  Akraneskaupstaður tók þá við  þjónustu og rekstri eftirfarandi þjónustuþátta:

• Sambýlið að Vesturgötu
• Sambýlið að Laugarbraut
• Fjöliðjan, vinnu- og hæfingarstaður Akranesi og Borgarnesi
• Frekari liðveisla við fatlað fólk, margháttuð aðstoð við ýmsar athafnir daglegs lífs
• Ráðgjöf og aðstoð við fatlað fólk, foreldra fatlaðra barna og ungmenna og aðstandendur til viðbótar við það sem fyrir er hjá félagsþjónustunni
• Stuðningsfjölskyldur
• Skammtímavistun í samvinnu við Borgarbyggð/þjónustusvæðið

Ferðaþjónusta fatlaðra

Á Akranesi er rekin ferðaþjónusta fyrir fatlaða frá Höfða - hjúkrunar- og dvalarheimili. Ferðaþjónusta fatlaðra er ætluð fyrir þá fatlaða sem ekki geta nýtt sér almenningsfarartæki til að geta stundað atvinnu, hæfingu, skóla eða farið til læknis. Félagsmálastjóri úrskurðar um þá einstaklinga sem eiga rétt á þjónustu.

Áfengis- og vímuvarnir

Lög um félagsþjónustu sveitarfélaga nr. 40/1991 setja ábyrgð á herðar sveitarfélögum  varðandi aðstoð við einstaklinga og fjölskyldur, sem eiga í erfiðleikum vegna  áfengis- og vímuefnaneyslu.  Í þessu felst m.a. aðstoð við einstaklinga sem eiga við áfengis- og vímuefnavanda að stríða í samvinnu við aðila sem vinna að vímuvarnamálum og ráðgjöf og leitarstarf meðal unglinga.  Félagsmálastjóri og framkvæmdastjóri Fjölskyldustofu hafa með sér samstarf varðandi vímuvarnir.

Húsnæðismál

Samkvæmt lögum um  húsaleigubætur nr. 100/1994, lögum um húsnæðismál nr. 44/1998  og húsaleigulögum nr. 36/ 1997 veita starfsmenn Félagsþjónustu fólki ráðgjöf og alhliða upplýsingar um húsnæðismál og húsaleigusamninga. Umsýsla á félagslegu húsnæði, úthlutun leiguíbúða í eigu bæjarins og greiðsla húsaleigubóta.